《WonderSwan，你也曾經覺得佢好型嘛？》
一件事…點為之「畀人遺忘」？
就係當你喺Google Search，
輸入頭幾個字，佢都唔再存在喺autocomplete suggestion
尋晚，
我喺Google Search “Wonder”，
冇出現 “WonderSwan“呢個autocomplete suggestion。
我知道，佢已經徹底被遺忘。
20年前，每個死𡃁仔，
都要做一個抉擇、甚至兩個。
就係
Gameboy Advance 定係 WonderSwan？
或者PS2定係Xbox？
我當時揀咗 WonderSwan，
朋友話「淨係開機嗰下都贏咗啦。」
我認同㗎。
不過，
遊戲雜誌介紹Wonderswan新Game的頁數都由好多版…變幾版…變1版，再變幾期先有1版。
佢已經冇咩Game出。
印象中嘅，只有一隻好好玩嘅獨眼高達，
同一隻打到第十關就永遠打唔贏嘅機戰。
對於一個儲N年零用錢，
僅僅可以買到其中一部遊戲機嘅我嚟講…
我呢世都冇擁有過Gameboy Advance，
只能夠喺N年後擁有Gameboy Advance 模擬器。
二揀一，多數揀錯；
兩者揀晒？又唔輪到我。
當時…呢部Wonderswan我儲起咗好耐，死都唔掉。
我幻想有一日，
呢一隻醜小鴨，都會變返天鵝。
直至今日，呢部Wonderswan去咗邊？
我已經完全唔記得。
甚至佢係咩顏色，我都真係冇印象。
無人會等你太耐。
忘記…其實會快好多。
我成日都諗，擅長揀錯嘅自己，
喺人生上已經畀幾多人遺忘咗呢？
一個無答案嘅問題，
偏偏最令人著迷。
不過我無再深究，因為退一萬步去諗：
「有得揀，仲想點喎？」
揀錯咗，起碼都叫自己收自己皮。
於願足矣。
講多個故事畀你聽呀。
最後係PS2同Xbox之間，
我兩者都冇揀。
應該話冇得揀，
因為當時我只係氹到媽媽…買旅行裝嘅ps one（二手）畀我。
但係...
喺自己屋企部電視，響起咗ps嘅聲音。
嗰種純粹嘅開心，而家嘅我已經再搵唔返。
IG: cheungson88
https://www.instagram.com/cheungson88/
你的一下Follow，我的無上成就
Search